ගොඩ මඩ දෙකම සරු සාරය

අද 2023 වැන්නේ ජනවාරි මස 29 වැනි දා, ඉරිදා.
27 වැනිදා පැරණි තොරතුරු සමුදායක් තුළ කිමිදෙමින් සිටි මට කුඩා කල මහත් රුචියෙන් තුරුළු කර ගත් කවි පොතක සටහන් හමුවුණා.

එසැණේ මා මුහුණු පොත බිත්තියේ මෙලෙසින් ලිව්වා.

"සිත් ඇඳි යටගියාව මතකයෙන් ගලිහී යන්නට මත්තෙන්, ආවර්ජනය වන අන්දමින් අකුරු කර තබන්නට ගත් වෑයමේදී, පොදු මතක ලෙස කිහිප දෙනෙකුගේ හෝ සිතේ මුල්ලකවත් සටහන්ව ඇති සොඳුරු තැන් කිහිපයක් මෙසේ ගෙන එන්න හිතුණා ඔබ වෙතට.

වලව්වේ ඉදිරිපිට වත්තේ කොණක
අදිරිගෙ සොහොන් කොත ළඟ තැනු මල් පැලක
මැණිකෙයි අඳ පුතයි ටිකිරියි හැම දිනෙක
මල් පහන් පුදනු කාටත් බැලිය හැක"

දැන් අද ලිහන්න යන්නෙ ඒ මතක ආවර්ජනයත් එක්ක පොදි ගැසූ "සුදෝ සුදු" කවි කතා පැස.

එතකොට මා තුන්වැනි පන්තියේ අකුරු කළ සමය. හරියටම පෙළ ගස්සන්න මතක රූ අපැහැදිලි වුවත් සාරය ගොනු කළ හැකියි.

මහා කවියෙක් අභාවයට පත්වූ පුවතක් සමග එතුමා රචනා කළ "සුදෝ සුදු" කාව්‍ය සංග්‍රහය ගැන කවුදෝ පැවසුවේ කියලා නම් මතකයට නඟා ගන්න අමාරුයි.
කොහොම වුණත් "ගොඩ මඩ දෙකම සරු සාරය ඵල බරය" ලෙසින් ආරම්භ වූ කවි කතාවක් මනසේ පතුළටම වැදී ගත් බව මතකය.
මේ කවි කතාවේ පොතත් කොහෙන් හෝ අතට පත්වූ බවත් මතකය.
බොහොම කෙටි කාලයකින් පොතේ කවි මුළ සිට එක දිගට විස්සක් විතර ඉක්මණින්ම කටපාඩම් වූයේ, ලිහිල් බස් වහරින් ලියවී තිබූ නිසාත්, කතාවේ කවිය සිතෙහි සිත්තමක් සනිටුහන් කළ නිසාත්ය.

1
ගොඩ මඩ දෙකම සරු සාරය ඵල බරය
කටුරොද ගම්මාන තරමක පිටිසරය
ඒ ගම මැදින් ගලනා ගඟ මනහරය
කඩමණ්ඩිය පිහිටියේ ගම කෙළවරය

2
ගමේ රාළහාමිගෙ පුත් වන ටිකිරී
බණ්ඩා තව ළදරුවා සත් වස සපිරී
එහි ගොවිරාළ කෙනෙකුගෙ පුතු වන අදිරී
අට අවුරුදු වයස් කොලුවෙකි ඇති දහිරී

3
වැන්දඹු අංගොහාමිගෙ සුරතල් දූට
යන්තම් පස් වසයි විසි අට වෙනිදාට
දුප්පත් කෙල්ල නොසිටියෙ නම් මේලාට
සැකයක් නැත අංගො පරලොව වැඩියාට

4
මේ දරුවන් තිදෙන ගඟ වැලිතලාවට
සෙල්ලම් පිණිස එති සමහර වෙලාවට
අදිරය කටුරොදේ මුළු ගම පළාතට
ගජ හපනා තමයි බට ලී නලාවට

5
ගතින් දුබල මුත් ටිකිරි ද නොනිවටය
නමුත් නිතර වූයේ ගුඩු ඇදුමටය
හැම සෙල්ලමේදිම ගහනා හරි ගැටය
කවදත් පාහෙ ජය හැඩි දැඩි අදිරිටය

6
හීන් මැණිකෙ මේ අංගොගෙ දුවගෙ නම
ඒකී එක වාගෙ කැමතියි දෙදෙනටම
ඉඳ හිට පැන නඟින කොට අඬදබර කම
ඈ මැදිහත්ව සංසිඳවයි හැමවිටම

7
'හීන් මැණිකෙ මගෙ' කියමින් කී ටිකිරී
බණ්ඩගෙ බසට කිපිලා හැඩි දැඩි අදිරී
බහින් බස් වෙලා ගහ ගැණුමට ඉදිරී
පත් වූ කීප වේලාවක මේ ළදැරී

8
ගහගන්නට එපා දෙන්නාටම බිරිඳ
වෙන්නම් නුඹල දෙන්නම මාගේ නොවෙද
සෙල්ලම් කරමු ඇයි මේ කලබල මොකද
කියමින් සැනසුවා සුමිහිරි බස් බොළඳ

"සුදෝ සුදු" චිත්‍රපටියකට නැගුණා හැට ගණන් වල. එය 1965 අප්‍රියෙල් 28 දා මහජන ප්‍රදර්ශනය සඳහා නිකුත් වූවා.

ඉහත 8 වැනි කවියට එනතුරු සිනමා කෘතියේ ගෙතී තිබුණේ මෙලෙසිනි. (වීඩියෝවේ අයිතිය "ටොරානා". අධ්‍යන කාර්යයකට හැරෙන්නට අනෙක් කිසිම කටයුත්තකට යොදා නොගන්න.)

ගායනය - ඩබ්.ඩී. අමරදේව ඇතුළු පිරිස
පද - චිත්‍රානන්ද අබේසේකර
ගී තනු හා සංගීතය - සෝමදාස ඇල්විටිගල

නව වැනි කවියේ සිට 13 වැනි කවිය දක්වා

9
ගතවිය කලක් අවුරුදු දහයක් ගෙවුණී
ඇසුර ද තුන් දෙනාගේ අඩු විය කෙමෙනී
මැහුම් ගෙතුම් හා සිය බස දත් රමණී
හීන් මැණිකෙ දැන් හරි ලස්සන තරුණී

10
අදිරි ගොවිපළේ හැම වැඩ වල සූරයි
ගමේ බරපතල වැඩ ටික ඔහු බාරයි
ටිකිරි දැන ඉගෙණ ගුණ නුවණින් මෝරයි
මේ තුන් දෙනාටම දැන් හොඳටම සාරයි

11
පායන පුන් සඳක් මෙන් වැසි වට සැණිනී
නා ගෙන ගෙදර එන මේ සුන්දර තරුණී
කුඹුරෙන් ගඟට යන මඩ ගෑවුණ ගතිනී
අදිරිට මගදි සැන්දෑවක මුණ ගැසුණී

12
නියරෙන් ලියද්දට බැස මඟ හැර අදිරී
සුන්දර මුහුණ බැලුවා උතුරණ මිහිරී
කලකින් මුණගැසුණ අර ඉස්සර මිතුරී
දැන් හරි ලස්සනයි මල් ඉතිරෙණ කුමරී

13
මතක් විය අතීතය ගැන එක විට ම
සිතිවිලි පහළ විය නාඳුනනා තරම
කොහොමද ඉතින් කොහොමද කලකින් මෙහෙම
හමු වුණ එක නොවෙද ඇත්තට හරි පුදුම

සිනමා කෘතියේ දිගහැරුණේ මෙලෙසිනි.

14
අදිරිගෙ බසින් ඔහු සිත තරුණිය දුටුවා
උවමනා නොවේ තව මේ ගැන අටුවා
පෙම් දෙව් දූ තොමෝ මුන් මගතුර සිටුවා
ඉරණම නළලෙ කොටමින් හරියට නැටුවා

15
හොඳයි මැණිකෙ යනවා දැන් රෑ වෙනවා
අප පෙර කල පතා ගත් හැටි හරියනවා
මාත් හවස් ජාමේ ගෙදරට එනවා
ඇවිත් අංගො නැන්දම්මා හමුවෙනවා

16
වචනෙන් දෙකෙන් තම අදහස මෙහෙම කියා
අදිරි ගඟ දෙසට ඇඟ හෝදන්ට ගියා
ඇය හදවත තුළේ ටිකිරිට තිබෙන දයා
මතු විය බලන්නට මෙන් මේ මොකද කියා

17
ටිකිරි පොහොසත්ය නැණ ගුණ දෙක වැඩිය
අදිරි දුප්පත්ය ගත සිත හැඩි දැඩිය
ඇගේ නියම ආලය මනිනා පඩිය
අදිරිගෙ පැත්තෙ ලා බැලුවම බර වැඩිය

18
අඳුරෙන් වැසුණු අහසෙහි බබලන තරුය
කුසුමින් හඬක් නැත බමරුන්ගන් දුරුය
සුවඳින් මුසුව එන මඳනල පියකරුය
මෙය හැන්දෑවෙ කටුරොද අද තොරතුරුය

19
අංගොගෙ ගෙදර සාලෙහි මැද මේසෙ උඩ
භූමිතෙල් කුප්පියට අද බොහොම වැඩ
අස්පස් කිරීමේ කටයුතු නිසා හැඩ
බැලුමටවත් හීන් මැණිකෙට නොමැත ඉඩ

20
වෙනදට වඩා ලහි ලහියේ අද මේම
සැරසිලි ඇයි කියා නොම දන්නා තාම
අංගොහාමි මේවා ගැන නොතකාම
පුදුම ද? කුස්සියේ කුරහන් හැඳි ගෑම

21 එළිය හුලක් ගත් කිසිවෙකු ගෙට එනවා
අංගෝ දුටු නිසා තම දුවනිය බණවා
වරෙං කුස්සියට කුරහන් රොස් වෙනවා
එන අය බලන්නට මම සාලෙට එනවා

22
දියනිය කුස්සියේ කුරහන් ලිප ගාවා
අංගෝ අමුත්තා පිළිගන්නට ආවා
අදිරි එළිය හුල ගෙයි මිදුලේ ලෑවා
ගෙට ගොඩ වැදී ආයූ බෝවන් කීවා

සිනමා කෘතියේ දිගහැරුණේ මෙලෙසිනි.

කතාව ඉවර නෑ. මඳ විරාමයක්.

ඉක්මණින් එනවා.....