දිගු නෙත් හසරැල්ලේ

දිගු නෙත් හසරැල්ලේ
මා සැනසුණ දවසේ
මේ නෙතු නවතා
මගෙ හිත අමතා
හිරු හිනැහුණ උදයේදී
ආදරයද මට කීවේ

උදේ හවා කල ගෙවෙන තුරාවෙදි
පටු මාවත් අතරේ
තුරුලිය හෙවණේ සිහිලස ලබමින්
ගත කළ සොඳුරු පැයේ
මල් හිනැහුණ උයනේදී
ආදරයද මට කීවේ

දිගු නෙත් හසරැල්ලේ
හිත රිදවුණ දවසේ
උණුසුම් සුසුමින්
නෙතු බොඳ වෙද්දී
සැඩ හිරු නැඟි මද්දහනේ
ආදරයද මට කීවේ

දෙදෙනා ආ මඟ
අද මා තනිවම
ඔබ නැහැ මගෙ හෙවණේ
වෛර කරන්නෑ මං කවදාවත්
සැණසෙනු ඔහු හෙවණේ
ප්‍රේමය රුදු සිහිනයකී
ආදරයයි මට කීවේ

දිගු නෙත් හසරැල්ලේ
අප වෙන්වුණ දවසේ
මා නෙතු හඬවා
ඔහු හද සනහා
හිරු වැළපෙන හැන්දෑවේ
ආදරයද ඔබ කීවේ

ගායනය - දයාරත්න පෙරේරා
පද - කුසුම් පීරිස්
තනුව - අජිත් ජයවීර

පැරණි ගීය

 

නව ගීය

ඈත හිනැහෙන තාරකාවී

ඈත හිනැහෙන තාරකාවී
සහන් එළියෙන් මඟ අසාගෙන
කතා කරනා ඔබේ නෙත් මත
මගේ රූ සිතුවම් මවන්නම්

නෙතට ළංවී හිඳින මොහොතේ
සුසුම් ලා ඉන්නේ කුමකටදෝ
වෙන කවුරුවත් නැති මං තලාවක
ඇවිදගෙන යමු නිසංසල යාමේ

ළදළු මුව මත සීත පින්නේ
ළහිරු එළියෙන් මුවාවී ගෙන
මගේ උණුසුම් සුසුම් සෙවණක
මිලින කඳුළක් හිනහුනාවේ

පවන් සලනා සොඳුරු මඳනල
මා හදේ රැන්දූ සෙනෙහසේ
ඔබ වාසනාවන් සුන්දරාවිය
දිවි තලාවේ අරුත දුන්නාදෝ

ඈත හිනැහෙන තාරකාවී
සහන් එළියෙන් මඟ අසාගෙන
කතා කරනා අපේ නෙත් මත
සොඳුරු සිතුවම් පෙමින් හමුවේ

ගායනය - යමුනා විනෝදනී සමග දයාරත්න පෙරේරා
පද - කුසුම් පීරිස්
තනුව - තිස්සසිරි පෙරේරා