පබළු නඟේ

පබළු නඟේ නාමල් තිලකේ
පුංචි ඔසරි මැණිකේ
සුමනෝ ....
නුඹ ඇයි නැත්තේ

වැවේ දියේ ඇති නිකිණ්නි නිල්ලේ
අඩ හඳ යායට කෙකටිය පිපිලා
වැව් කන්දේ බෝ ගස් හෙවණේ
මම අද තනියම ඔලිඳ ගණිනවා
වෙනදා වාගෙම තල මල පිපිලා
තිබුණට ඇළ ළඟ වත්තේ
සුමනෝ ....
නුඹ ඇයි නැත්තේ

මළ හිරු එළියෙන් කොක්කු ගියාදෝ
මිහින්තලා ගල පැත්තේ
පිරුවට ඇඳ පෙට්ටියක තියාලා
පාන් දෙපස එළි මැද්දේ
මදටිය වැටෙද්දී හඳ කැලතෙන ඇළ
ඒ දණ්ඩේ ඉස්මත්තේ
සුමනෝ ....
නුඹ ඇයි නැත්තේ....

සුමනෝ ....
නුඹ ඇයි නැත්තේ....//

ගායනය - ගුණදාස කපුගේ
පද රචනය - රන්බණ්ඩා සෙනෙවිරත්න
තනුව - ගුණදාස කපුගේ

දවසක් පැල නැති හේනේ

දවසක් පැල නැති හේනේ
අකාල මහ වැහි වැස්සා
තුරුළේ හංගා ගෙන මා ඔබ තෙමුනා අම්මේ
පායන තුරු හිටි පියවර හිටියා ඔබ අම්මේ

නුවර වීදි යට කරගෙන නින්දා වැහි වැගිරුණ දා
බිරිඳකගේ සෙනෙහෙ ගියා යෝධ ඇලේ නැම්මේ
ඔබ සෙනහස සුවඳ දිදී දැනුණා මට අම්මේ
ඔබ සෙනහස සුවඳ දිදී දැනුණා මට අම්මේ

කොළඹ අහස කළු කරගෙන
මූදු හුළඟ හඬලනකොට
ඔටුන්න බිමදා දුවගෙන එන්නද එක පිම්මේ
මං එනතුරු ඉඳිකඩ ළඟ ඉන්නවාද අම්මේ ///

ගායනය - ගුණදාස කපුගේ
පද රචනය - රන්බණ්ඩා සෙනෙවිරත්න
තනුව - සේන ජයන්ත වීරසේකර

උලලේනෝ

පාළුව දෙවනත් කරලා

නාඬන් උලලේනෝ

කාටත් නපුරු දා තනිකම් ඇතිවෙනවා

උලලේනෝ ....... (ඔඔ ඔඔ ඕ.. ඕ.....)

උලලේනෝ

හීත හුළං හිරිකඩයි

කැලේ අපට උරුමේ

උඹට පිහාටුයි මට පැල්පතයි තියෙන්නේ

උලලේනෝ ....... (ඔඔ ඔඔ ඕ.. ඕ.....)

උලලේනෝ

ඉහිරුණ කිරි කොතලෙට

ඉකි බිඳලා ඵල නෑ

උඹටත් එක්කයි මේ පැල් කවිය කියන්නේ

උලලේනෝ ....... (ඔඔ ඔඔ ඕ.. ඕ.....)

උලලේනෝ

සංසාරේ හැටි තමයි

වියෝග ඇතිවන්නේ

නිවනට ගිය දා මේ හැම දුක් නැතිවන්නේ

උලලේනෝ ....... (ඔඔ ඔඔ ඕ.. ඕ.....)

උලලේනෝ

ගායනය - ගුණදාස කපුගේ

පද රචනය - රන්බණ්ඩා සෙනෙවිරත්න

තනුව හා සංගීතය - ගුණදාස කපුගේ

Song - Ulaleno
Singer - Gunadasa Kapuge
Lyricist - Ranbanda Senevirathna
Composer - Gunadasa Kapuge

ළඳුනේ

ළඳුනේ .... ළඳුනේ .....

ඔබේ දෑස දැක ගත්තෙමි
සැදෑ කලෙක ළඳුනේ .... ළඳුනේ ...

දෙනෝ දහක් අත ගත්ත ද
සැමියෙකු නැති ළඳුනේ
නෑයෙක් නෑකම් නො කියන
වීදි සරන ළඳුනේ ... ළඳුනේ ....

තෙල් මල් ගෙන දෝත පුරා
මුනි කුටියට පිය මං වන
ඔබේ දෑස දැක ගත්තෙමි
සැඳෑ කලෙක ළඳුනේ .. ළඳුනේ …

බුදුන් දැක නිවන් දකිමැයි
දෙව්රම යන පාර අහන
ඔබ ද පටාචාරාවකි
ඔබ ද කිසා ගෝතමියකි

පිරිමින්ගේ පාප කඳට
දෝස විඳින ළඳුනේ
අඳුරේ පව් කරන දනා
එලියෙ රවන ළඳුනේ
ලැම පමණක් ලොවට පෙනෙන
ළය නො පෙනෙන ළඳුනේ
කුහුඹුවකුට වරදක් නැති
වැරදිකාර ළඳුනේ

ගායනය - අමරසිරි පීරිස්
පද රචනය - රන්බණ්ඩා සෙනෙවිරත්න
තනුව - ආචාර්ය ප්‍රේමසිරි කේමදාස