කඳුළු විලේ

කඳුළු විලේ

තරඟ දැලේ

පිපෙනා සිනා මල් ළඳුනේ

හද මඬලේ

සඳළු තලේ

දිලෙනා නිශා මධු සඳුනේ ....//

සිහින දනව්වේ

අඳුරු ඉසව්වේ

ඔබ දෑස තරු බැබළේවා ....//

ඒ තරු කිරණේ

මඟ හෙළිවන්නේ

හදේ විඩා තැවුල් නිවේවා

කඳුළු විලේ

තරඟ දැලේ

පිපෙනා සිනා මල් ළඳුනේ

හද මඬලේ

සඳළු තලේ

දිලෙනා නිශා මධු සඳුනේ

සිතැඟි කොදෙව්වේ

සුදු මුතු පව්වේ

ඔබ දෑත මට ළංවේවා .....//

ආ දුරු කතරේ

ඉම හමුවන්නේ

හදේ විඩා තැවුල් නිවේවා

කඳුළු විලේ

තරඟ දැලේ

පිපෙනා සිනා මල් ළඳුනේ

හද මඬලේ

සඳළු තලේ

දිලෙනා නිශා මධු සඳුනේ

ගායනය - දමයන්ති ජයසූරිය සමග සුනිල් එදිරිසිංහ

පද - කුලරත්න ආරියවංශ

තනුව - ආචාර්ය රෝහණ වීරසිංහ

1991 දී “හිරුට මුවාවෙන්” නමින් නිකුත්වූ සංයුක්ත තැටියට මේ ගීය ඇතුළත් විය.

මේ සඳ රැල්

මේ සඳ රැල් මේ තුරු වැල්

කොහේද රැඳුණේ ඔබ හමුවන්නට පෙර .....//

සඳ නැඟුණට ලොව දිලුණට එකවර මෙලෙසින්

රැය මින් පෙර වීද කෙදින මෙතරම් මනරම් ....//

මේ කඳු රැල් මේ ගඟුලැල්

කොහේද රැඳුණේ ඔබ හමුවන්නට පෙර

මිහිලිය බඳ රුව මන නඳ මිණි මුතු නිතියෙන්

ලොව කිසි විට නොවී එසඳ මෙතරම් මනරම්

මේ හසරැල් මේ සිහිලැල්

කොහේද රැඳුණේ ඔබ හමුවන්නට පෙර

මේ සඳ රැල් මේ තුරු වැල්

කොහේද රැඳුණේ ඔබ හමුවන්නට පෙර

ගායනය - සුනිල් එදිරිසිංහ

පද - කුලරත්න ආරියවංශ

තනුව - ආචාර්ය රෝහණ වීරසිංහ

මෙම ගීය ඇතුළත් වුුණේ 1992 දී සින්ග්ලංනා ලේබලයෙන් නිෂ්පාදනය වූ “අමල් බිසෝ” කැසට් පටයටයි.

අරුණ උදාවේදෝ

අරුණ උදාවේදෝ

අඳුර නිමාවේදෝ

මිහිමඬල පුරා ගණ තිමිර ඉරා

නැණ අරුණ පහන් වේදෝ

අවා දෙරණේ ....//

මනුසත් උයනේ මුදු සිත් පරවී

හසරැල් ගිලිහී යයි

මිහි මව් තුරුලේ නොමිනිස් කතරේ

ගිනිදැල් මතුවී එයි

එද ගිනි නිවනා දිය දහරා

කවදාදෝ හමුවන්නේ

දයා මහිමේ

අරුණ උදාවේදෝ

අඳුර නිමාවේදෝ

මිහිමඬල පුරා ගණ තිමිර ඉරා

නැණ අරුණ පහන් වේදෝ

අවා දෙරණේ

කඳුළින් තැවෙනා දෙනුවන් හමුවේ

ලොව නෙත් අඳ වේ නම්

ළසොවින් දැවෙනා සුදනන් හමුවේ

දුදනන් සැනහේ නම්

මිනිසුන් නොවෙනා දෙරණක දෝ

අවසානය එළඹෙන්නේ

නිරා ගමනේ

අරුණ උදාවේදෝ

අඳුර නිමාවේදෝ

මිහිමඬල පුරා ගණ තිමිර ඉරා

නැණ අරුණ පහන් වේදෝ

අවා දෙරණේ

ගායනය - සුනිල් එදිරිසිංහ

පද - කුලරත්න ආරියවංශ

තනුව - ආචාර්ය රෝහණ වීරසිංහ

මෙම ගීය 1989 දී “නිම් තෙරක්” කැසට් පටය තුළින් දොරට වැඩියා. 2001 දී “නෑසෙන ගී රස 1” සංයුක්ත තැටියට හා කැසට් පටයටත් ඇතුළත් වුණා.

අවපස අහසක

අවපස අහසක තරු ලකුණක් සේ

අපමණ සයුරක තුරු දසුනක් සේ

දිගු දිවි ගමනේ

ඉම ඔබ රැඳුණේ ....//

මාවත අවහිර නිමවා

දළ රළ පෙළ සැතපෙනවා

සැළමුතු සෙනෙහස මඳ පවනක් වී

ගැඹරේ නිම මුමුණනවා

අවපස අහසක තරු ලකුණක් සේ

අපමණ සයුරක තුරු දසුනක් සේ

දිගු දිවි ගමනේ

ඉම ඔබ රැඳුණේ

දෝතක අසෙනිය ගවසා

ඔබ පෙර මඟ හිනැහෙනවා

විකසිත සිහිනේ සුබ කවියක් වී

දෙනෙතේ සිත ලියැවෙනවා

අවපස අහසක තරු ලකුණක් සේ

අපමණ සයුරක තුරු දසුනක් සේ

දිගු දිවි ගමනේ

ඉම ඔබ රැඳුණේ

දිගු දිවි ගමනේ

ඉම ඔබ රැඳුණේ .....///

ගායනය - සුනිල් එදිරිසිංහ

පද - කුලරත්න ආරියවංශ

තනුව - ආචාර්ය රෝහණ වීරසිංහ

මෙය 1988 දී “මල් වට්ටියක්” කැසට් පටයතුළින් දොරට වැඩි ගීයකි. 1995 දී “මියුරු ගී 2 - රන් මලක්” සංයුක්ත තැටියට හා කැසට් පටයටත්, 2003 දී “The best of Sunil 2” සංයුක්ත තැටියට හා කැසට් පටයටත් ඇතුළත් වුණා.

මගේම නෙතු යුග

මගේම නෙතු යුග

අසරණ මා ඇයි

මේ ලෙස රවටන්නේ

මගේ සවන් යුග තනිවූ මා සිත

ඇයිදෝ රිදවන්නේ ....//

යන එන මාවත ගැවසෙන රූ මැද

ඇයගේ රුවම මවා

මා රවටා හිනැහෙන්නට තරමට

නෙත් යුග කුරිරු වෙලා

මගේම නෙතු යුග

අසරණ මා ඇයි

මේ ලෙස රවටන්නේ

මගේ සවන් යුග තනිවූ මා සිත

ඇයිදෝ රිදවන්නේ

නිසසල හැම විට සිහිනෙක විලසට

ඇයගේ හඩම නඟා

මා රවටා සැනසෙන්නට තරමට

දෙසවන් නපුරු වෙලා

මගේම නෙතු යුග

අසරණ මා ඇයි

මේ ලෙස රවටන්නේ

මගේ සවන් යුග තනිවූ මා සිත

ඇයිදෝ රිදවන්නේ ....//

ගායනය - සුනිල් එදිරිසිංහ

පද - කුලරත්න ආරියවංශ

තනුව - ආචාර්ය රෝහණ වීරසිංහ

සින්ග්ලංකා නිෂ්පාදනයක්වූ "සඳකඩපහණ" කැසට් පටයට 1982 දී  ඇතුළත්වූ මේ ගීය, 2001 වසරේදී නැවතත් සින්ග්ලංකා "නෑසෙන ගී රස 2" සංයුක්ත තැටියට හා කැසට් පටයට ඇතුළත් වුණා.

පින්නේ රැයේ කඩ අගුවක

පින්නේ රැයේ කඩ අගුවක නිදනවද

ලොරියක ගෝනි මත්තේ නිදි කිරනවද

කරවල වාඩියක සිරවී තැවෙනවද

මල්ලියෙ කොහේ කොතැනක නුඹ සිටිනවද

අම්මා විඳ දරාගෙන හැම දුක් ගැහැට

නැති බැරි වුණත් දුක දුන්නේ නැහැ නුඹට

බැරි වුණු නිසා මට අකුරෙන් ජය ගන්ට

දහ දුක් ඉහිලුවේ නුඹ තැනකට ගන්ට

ඉස්කෝලේ නොයා කැලයට පැන්නාට

තරවටු කළේ ගුරු දෙගුරුන් නුඹෙ හොඳට

ගහ බැන්නේ හදාගන්නයි මං නුඹට

හිතුවේ අනේ ඇයි ඒ හැම වැරදියට

නුඹ නැති දා ඉඳන් අම්මා හැඬු කඳුළෙන්

ඔත්පල වුණා අප්පච්චී සංකාවෙන්

ගේ මළ ගෙයක් වාගෙයි අද නුඹ නැතියෙන්

හනිකට වරෙන් ඉගිලී ඉන්නා තැනෙකින් //

ගායනය - සුනිල් එදිරිසිංහ

පද රචනය - කුලරත්න ආරියවංස

තනුව - රෝහණ වීරසිංහ

ශ්‍රී ලංකා ගුවන් විදුලි සංස්ථාවේ සරල ගී වැඩසටහනකින් දොරට වැඩි මෙම ගීය,  1982  වසරේ සින්ග්ලංකා ලේබලෙයන් නිකුත්වූ " සඳකඩපහණ" කැසට් පටයට ඇතුළත් විය.

පීදිලා පැතුම්

පීදිලා පැතුම් 

පෑදිලා රුවන්

ආසිරී ගායනා 

මේ ඔබේ නමින් ...//

චේතනා පෑහිලා දෑස සේ රැඳී

ජීවිතේ වාසනා ලොවේ සදා බැඳී

පීදිලා පැතුම් 

පෑදිලා රුවන්

ආසිරී ගායනා 

මේ ඔබේ නමින් ...//

ස්නේහයේ දාමයේ දෑත යාවෙලා

සාමයේ මාවතේ ඈත පාවෙලා

පීදිලා පැතුම් 

පෑදිලා රුවන්

ආසිරී ගායනා 

මේ ඔබේ නමින් ...//

ගායනය - සුනිල් එදිරිසිංහ

පද - කුලරත්න ආරියවංශ

තනුව - ආචාර්ය රෝහණ වීරසිංහ

චිත්‍රය ජෝර්ජ් කීට් ශිල්පියාගේ නිර්මාණයකි.

මෙම ගීය දොරට වැඩියේ ශ්‍රී ලංකා ගුවන් විදුලි සංස්ථාවේ සරල ගී වැඩසටහනකින්. 1981 දී "චන්ද්‍ර මඬල" කැසට් පටයටත්, 2001 දී සින්ග්ලංකා "නෑසෙන ගී රස 2" සංයුක්ත තැටිය හා කැසට් පටයටත්, ඇතුළත් වුණා.

තාරකා මල් පිපී හිනැහෙන

තාරකා මල් පිපී හිනැහෙන

ප්‍රේමයේ මල් මාවතේ

පා නඟා යමු ඈත ලොවකට

නිවා ළතැවුල් ජීවිතේ ...//

හිරු සඳුට හා ලොවට රහසින්

සදාගමු අපෙ පුංචි ලෝකය ...//

දුකට කඳුළට පවුරු බඳිමින්

පෙමින් සරසමු එවන් ලෝකය

තාරකා මල් පිපී හිනැහෙන

ප්‍රේමයේ මල් මාවතේ

පා නඟා යමු ඈත ලොවකට

නිවා ළතැවුල් ජීවිතේ

ඔබේ දෙනයන කැළුම් ඇත මට

එළිය වන්නට මගේ ලෝකය ...//

ඔබේ සිහිලැල් සුවැති සෙවණින්

නිවී සැනහෙයි මගේ ජීවය

තාරකා මල් පිපී හිනැහෙන

ප්‍රේමයේ මල් මාවතේ

පා නඟා යමු ඈත ලොවකට

නිවා ළතැවුල් ජීවිතේ ...//

ගායනය - සුනිල් එදිරිසිංහ සමග මාලිනී බුලත්සිංහල

පද - කුලරත්න ආරියවංශ

තනුව - වික්ටර් රත්නායක

සුනිල් එදිරිසිංහයන්ගේ ප්‍රථම ගුවන් විදුලි සරල ගී වැඩසටහන (1975) සඳහා ගැයුණු ගීයකි. එදා එම වැඩසටහනට සුනිල් එදිරිසිංහ මේ ගීය ගැයුවේ නිරංජලා සරෝජිනී සමගය.
1984 දී මෙම ගීය සින්ග්ලංකා සමාගමේ "පිනිබර යාමේ" කැසට් පටය ට ඇතුළත් විය.