ගොම රිටි ගිලී

 

ගොම රිටි ගිලී තිරුවානා උඩ එනවා

හරි ජරමරේ හොඳ නරකත් පැටලෙනවා

දවසින් දවස අරුමෝසම් ගොඩ වෙනවා

ගම්මානෙටත් මොනවද වේගෙන එනවා

සිල් ගන්නා විනා රකිනා කෙනෙක් නැතී

බණ දෙසනා විනා අසනා කෙනෙක් නැතී

නැතිවෙන්නා විනා ගන්නා කෙනෙක් නැතී

ගුටි කන්නා විනා ගසනා කෙනෙක් නැතී

මව් තුරුළේ තියා දරුවන්ට සැප සොයා

පිරිමහ ගනු කියා අප්පා වැඩට ගියා

තව මදි මදි කියා පෝසත් වෙන්ට කියා

අම්මා රට ගියා පවුලම නොමඟ ගියා

ඉස්සර නම් හැංගි හැංගී තනි යාමේ

දැන් එළිපිටම නරි නාටක ගජරාමේ

පද කස්තිරම් තව ඇත නටතොත් මාමේ

හොඳ හොඳ නැටුම් බලතැකි එළිවෙන ජාමේ

ගායනය - ‍රෝහණ බැද්ද‍ගේ

පද රචනය - ‍රෝහණ බැද්ද‍ගේ

ජන ගායනා (සීපද) නාද රටා ඇසුරින්, සංගීත අදියුරු - රෝහණ බැද්ද‍ගේ 
සිත්තම - ගෝතමී විහාරයේ ජෝර්ජ් කීට් ශිල්පියා කළ සිතුවම් අතරින්