Tuesday, December 3, 2013

හත් මුහුදින් එපිට ගුගුරුවා

හත් මුහුදින් එපිට ගුගුරුවා
බතරොයි උගුරු දණ්ඩ
හත් දෙයියන් බලා ඉද්දී
සුද්දො ආවෙ රට කරන්න
මහත්වරුනි දන්නවාද
සුද්දො ආවෙ රට කරන්න //

ඇත් දත් ගම්මිරිස් කුරුඳු
මැණික් අරන් එතෙර යන්න
ලක් මවුනගෙ දරු පැටවුන්
වහල් කමේ තියාගන්න
වැව් බිඳ රන්කොත බිම ලා //
දා ගැබ පිට කොඩි දමන්න
මහත්වරුනි දන්නවාද
සුද්දො ආවෙ රට කරන්න //

යෝධ කඳු වළලු වටලා
වන හිස මුඩු බිම් කරන්න
කෝපි තේ රබර් වවලා
එතෙර එදේශෙට යවන්න
ඉර නොබහින පොළොව වටේ //
කතිර කොඩිය ලෙළ දෙවන්න
මහත්වරුනි දන්නවාද
සුද්දො ආවෙ රට කරන්න //

සත්තු වගේ මඩ කා ගෙන
දිව කා ගෙන බර අදින්න
උත්තම අදිරාජ්ජෙකට
ජීවත පූජා කරන්න
අනේ අපොයි අපිත් ගියා //
පය පාමුල වාල් වෙන්න
මහත්වරුනි දන්නවාද
සුද්දො ආවෙ රට කරන්න //

හත් මුහුදින් එපිට ගුගුරුවා
බතරොයි උගුරු දණ්ඩ
හත් දෙයියන් බලා ඉද්දී
සුද්දො ආවෙ රට කරන්න
මහත්වරුනි පේනවාද
අදත් එනවා රට කරන්න //

ගායනය - සුනිල් එදිරිසිංහ
පද - රත්න ශ්‍රී විජේසිංහ
තනුව - ආචාර්ය රෝහණ වීරසිංහ